Казан Кремлендә «Оста фигыль – яңа формат» бәйгесендә җиңүчеләр өчен профессиональ тренинг узды

Казанда 24-29 июньдә «Оста фигыль – яңа формат» бәйгесендә җиңүчеләр өчен профессиональ тренинг узды. Ул 2016 елда Потанин Фонды, Дәүләт Эрмитажы һәм Екатеринбург сынлы сәнгать музееның уртак инициативасы белән оештырыла. Быел проект «ПРО АРТЕ» фонды тарафыннан гамәлгә ашырыла.

Мәдәният өлкәсендә журналистлар һәм блогерлар өчен «Оста фигыль» һөнәри осталык бәйгесе озак вакыт Дәүләт Эрмитажы директорының күргәзмәләр һәм үсеш буенча урынбасары булып эшләгән Владимир Матвеев исемен йөртә. Ул «Зур Эрмитаж» проектын булдыруга зур өлеш кертә,  Россиянең һәм дөньяның төрле төбәкләрендә, шул исәптән «Эрмитаж-Казан» үзәгендә музейның юлдаш үзәкләрен булдыруны үз эченә ала.

Быел тренинг Казанда «Казан Кремле» музей-тыюлыгы һәм «Эрмитаж–Казан» үзәге нигезендә узды. Тренинг экспертлары:

• «Артгид» сәнгать порталының баш мөхәррире Мария Кравцова,
• «Санкт-Петербург» телеканалының «Культурная эволюция» программасын алып баручы һәм редакторы Александра Мымрина,
• «Культурное просвещение» оешмасы президенты, режиссер, социолог Вадим Овчинников,
• «Партнерский материал» подкасты авторы Лидия Кравченко,
• «Знакомьтесь, Нижний» телеграм-каналының баш мөхәррире, журналист Мария Гончарова.

Россиянең төрле шәһәрләреннән 17 җиңүче телеграм-канал һәм подкаст булдыру һәм аны алга таба үстерү практикаларын өйрәнде; июнь аенда күргәзмә залларында ачылган «Авангард. XXI гасырга арбада» күргәзмәсе мисалында мәдәни вакыйгаларны яктырту форматын тикшерде; «Эрмитаж-Казан» үзәге хезмәткәрләре һәм «“Үз күзләреңә ышанма”. Сәнгатьтә иллюзияләр» күргәзмәсе рәссамнары белән эшләгәндә интервью жанрында практика үтте; Казан Кремле музейларының вакытлы күргәзмәләрендә һәм даими экспозицияләрендә булды; Эрмитаж-Казан үзәгендә экспонатлар ротациясен күзәтте.

Шулай ук катнашучылар «Казан Кремле» музей-тыюлыгы директоры Илнур Рәхимов һәм Татарстан Республикасы Милли китапханә директоры Мәдинә Тимерҗанова, Казан Яшьләр театры матбугат сәркатибе Валерия Завьялова һәм «Зөя утрау-шәһәрчеге» музей-тыюлыгының матбугат хезмәте башлыгы Юлия Нуриева катнашындагы дискуссиядә массакүләм мәгълүмат чаралары һәм мәдәни институтларның үзара эшчәнлеге тәҗрибәсе турында фикер алышты.