Апрель аенда «Мирас һәм туризм: үзара хезмәттәшлек һәм үсеш юллары» XIII Халыкара фәнни-гамәли конференциясе узачак

2024 елның 17-19 апрелендә «Казан Кремле» музей-тыюлыгында «Мирас һәм туризм: үзара хезмәттәшлек һәм үсеш юллары» XIII Халыкара фәнни-гамәли конференциясе узачак. Чара Халыкара һәйкәлләр һәм тарихи урыннар көненә бәйле, тарихи-мәдәни мирасны саклау, популярлаштыру һәм презентацияләү мәсьәләләренә багышланган.

2024 елда «Казан Кремле» музей-тыюлыгы үзенең 30-еллыгын билгеләп үтә. Бу истәлекле юбилей безгә мәдәни мирасны саклау һәм популярлаштыруның мөһимлеген, шулай ук тарихи урыннар белән идарә итүдә даими үсеш юлларын һәм яңа алымнарын эзләү кирәклеген искә төшерә.

Моннан тыш, 2024 елда Россия Федерациясенең мәдәни кыйммәтләрне саклау һәм реставрацияләү мәсьәләләрен өйрәнү буенча Халыкара үзәктә (ИККРОМ) «Казан Кремле» музей-тыюлыгының әгъзалыгы яңартылуга 10 ел тула.

Конференциядә музей эшендә актуаль мәсьәләләр һәм тенденцияләр турында фикер алышу, тәҗрибә һәм идеяләр алмашу, шулай ук һөнәри элемтәләрне ныгыту планлаштырыла.

Конференциянең тематикасы:

• Мәдәни туризм һәм кунакчыллык индустриясе
• Матди мәдәни мирасны саклау: яңа мәгънәләр эзләү
• Тарихи-мәдәни мирас һәм аның гаилә ялын оештырудагы роле
• Традицияләрне саклау: гастрономик туризм һәм этномәдәни мирас

Конференция кысаларында планлаштырылган чаралар:

• Татарстан Республикасында XXI гасыр дизайны мирасын саклау һәм үстерү мәсьәләләре буенча Бөтенроссия декоратив сәнгать музее (Мәскәү шәһәре) белән берлектә «Мода һәм дизайн мирасы көне» стратегик сессиясе. Сессиядә катнашучылар мода һәм дизайн өлкәсендә музей экспертизасын үстерүнең актуальлеге, үзара бәйләнешнең яңа форматлары һәм креатив индустрияләргә ярдәм чаралары турында фикер алышачак.

• Актуаль музей практикалары турында Татарстан Республикасы музейлары директорлары катнашында пленар утырыш.

• «Музей мәйданында гаилә ялы: иң яхшы практикалар һәм тенденцияләр» түгәрәк өстәл

• «Мәдәни туризм һәм музей индустриясе» музей индустриясе белгечләре белән фикер алышу

Конференция нәтиҗәләре буенча электрон җыентык әзерләнәчәк һәм алар РИНЦ системасына кертеләчәк.

Конференциядә катнашу шартлары:

• Катнашу: шәхси.

• Конференциядә катнашу мәкаләне бастырып чыгаруның мәҗбүри шарты булып тора.

• Конференциядә катнашырга теләүчеләргә 25 мартка кадәр гариза бирергә кирәк. Оештыру комитеты үзенең карары турында электрон почта аша 2024 елның 29 мартыннан да соңга калмыйча хәбәр итәчәк. Оештыру комитетының конференция темасына туры килмәгән гаризаларны кире кагу хокукы бар.

• Җыентыкта бастыру өчен мәкаләләр 2024 елның 29 апреленә кадәр кабул ителә. Рәсмиләштерү таләпләре гариза кабул ителгәннән соң юллана.

• Конференциядә катнашучылар юл һәм яшәү чыгымнарын үз хисабына башкара.

Өстәмә мәгълүмат өчен һәм сораулар буенча фәнни-методик эш бүлегенә +7 (843) 567-80-29 номерына шалтыратырга, яки nauka.kreml@mail.ru электрон тартмасына хат юлларга мөмкин.