«Авангард. XXI гасырга арбада» күргәзмәсе реставрацияләнгән ике картина белән тулыланды

8 сентябрьдән тамашачылар Казан Кремленең Гавами урыннары күргәзмә залында узучы «Авангард. XXI гасырга арбада» күргәзмәсе өчен махсус реставрацияләнгән ике яңа картинаны күрә ала. Болар – Георгий Лазаревның «Натюрморт» (1919 ел) һәм Леонид Плетневның «Три дамы» (1919 ел) эшләре. Алар Яран туган якны өйрәнү музеенда йөз елдан артык сакланган һәм 2023 елның маенда кураторлык төркеменең музейга сәфәре барышында табылган.

Реставрациянең иганәчесе – Shiphra зәркән йорты. Алар планетаның киләчәген кайгыртып лаборатор шартларда үстерелгән бриллиантлар, зөбәрҗәтләр, зәңгәр һәм кызыл якутлардан ясалган High Jewelry бизәнү әйберләре җитештерүдә махсуслаша.

Картиналарны тәкъдир иткәндә «Сколково» идарә мәктәбенең стратегик коммуникацияләр һәм социаль җаваплылык буенча директоры Ксения Трифонова болай дип белдерде: «Без «Рус авангарды энциклопедиясе» проектындагы хезмәттәшләребез белән танышкач, мин, әлбәттә, бу картиналарны реставрацияләү идеясенә җавап бирдем. Безнең мәктәпне тәмамлаучылар арасыннан иганәче табылды. Аның тырышлыгы белән бу картиналар бүген залда. Безнең чыгарылыш укучыларыбызның бизнес-проектларны уңышлы гына эшләп калмыйча, социаль мөһим һәм мәдәни инициативаларга да игътибар бирүләре безнең өчен бик күңелле һәм шатлыклы. Бу безнең хезмәттәшлекнең башы һәм без тагын бик күп уртак проектлар эшләячәкбез дип ышанасы килә».

«Рус авангарды энциклопедиясе» мәдәни проекты директоры Юлия Каптановская: «Реставрация эшләре Мәскәүдә барды һәм нибары өч ай вакыт эчендә тәмамландв. Картиналарны 20 елдан артык музей реставрациясе тәҗрибәсе булган 2 нче категорияле рәссам-реставратор Алексей Кинчев торгызды. Төп эшләр – грунтны ныгыту, югалган буяу катламын тулыландыру, рам астын алыштыру, окладка ясау», – өстәде

Реставрацияләнгән картиналар һәм авторлар турында Нократ сәнгать музее директоры, рус авангардын тикшерүче, Нократта Василий Кандинский эшләрен беренче булып ачучы, күргәзмә кураторы Анна Шакина җентекләбрәк сөйләде: «Шунысы кызык, реставрациядән чыккан эшләр әлеге авторларның башка әсәрләре белән янәшә тора. Шул рәвешле без бу кызыклы рәссамнарның иҗатын күз алдына китерә алабыз. Шуларның берсе – Леонид Плетнев һәм аның «Три дамы» әсәре. Оста натурадан язмый, ә сюжет уйлап таба, XIX гасыр ахыры – XX гасыр башы тарихына һәм мәдәниятенә мөрәҗәгать итә. Кызыклы төсләр гаммасы, алар арасындагы яшел, зәңгәр, сары-кызгылт сары төсмерләр бу эшкә бәйрәм кәефен кертә. Икенче картина – Георгий Лазаревның «Натюрморт» әсәре. Бу эштә оста форманы, күләмне тапшыра белүен күрсәтә. Күрәсезме, бу натюрмортта нинди кызыклы төсләр гаммасы. Әлбәттә, бу рәссам бик ачык индивидуалист».

Күргәзмәнең эш вакыты: дүшәмбе-пәнҗешәмбе – 10:00-18:00, җомга – 11:00-20:00, шимбә-якшәмбе – 10:00-18: 00

Адрес: Гавами урыннары күргәзмә заллары, 2 подъезд, 2 кат

Элемтәләр: +7 (843) 567-81-76, vistavka@kazan-kremlin.ru

Күргәзмә 2025 елның 12 гыйнварына кадәр дәвам итәчәк.