«Эрмитаж-Казан» үзәге Европа сәнгатенең «гүзәл чоры» белән таныштыра

«Эрмитаж-Казан» үзәге Дәүләт Эрмитажы тупланмасыннан «Гүзәл чор. XIX-XX гасырлар чигендәге Европа сәнгате» күргәзмәсен тәкъдим итә. Ул Европада Франция-Пруссия сугышы тәмамлану (1871) һәм Беренче бөтендөнья сугышы башлану (1914) арасында «Belle Époque» – «гүзәл чор» исеме алган чорда мәдәниятнең моңарчы күрелмәгән чәчәк атуына багышлана.

Күргәзмәдә тамашачылар алдында кырык елдан артык вакытны үз эченә алган сәнгатьнең киң панорамасы бирелә. Экспозицияне Дәүләт Эрмитажы тупланмасыннан 175 экспонат тәшкил итә. Монда Камил Писсарро, Клод Моне, Поль Гоген, Андре Дерен, Огюст Ренуар, Анри Море, Альфред Сислей, Поль Сезанн, Анри Матисс, Пабло Пикассо, Анри Руссо, Альфред Моурер, Альфонс Муха, Анри де Тулуза-Лотрек, Эжен Грассе һәм башка осталар бар.

Күргәзмәнең ачылыш тантанасында, Татарстан Республикасы мәдәният министры Ирада Әюпова: «Инде 20 ел дәвамында без Дәүләт Эрмитажының бай коллекциясеннән, шулай ук төньяк башкаланың музей киңлекләрен формалаштыру эстетикасыннан ләззәт ала алабыз», – дип билгеләп үтте. Министр Татарстан Республикасы Рәисе Рөстәм Миңнехановка ярдәме өчен рәхмәт белдерде һәм үзәкнең барлык күргәзмә проектларының тамашачылар арасында популяр булуын ассызыклап узды.

Дәүләт Эрмитажының Көнбатыш Европа сынлы сәнгать бүлеге мөдире, күргәзмәнең кураторы Михаил Дединкин болай дип сөйләде: «Бу күргәзмә белән без сезне Парижга, XX гасыр сәнгате Матисс һәм Пикассо әңгәмәсе туган чор чигенә чакырабыз. Биредә шәһәр, шәһәр кешеләре һәм аларның күңел ачу образлары, гүзәл затлар, көнкүреш әйберләре һәм афишалар бар. Һәм хәзер Казанда Орсеның кечкенә музее ачыла, анда бөек осталарның әсәрләре, мәдәни мохит тудырган эшләр һәм гаҗәеп мөһим артефактлар бар».

Көнбатыш Европа сынлы сәнгать бүлегенең өлкән фәнни хезмәткәре, баш саклаучысы Ольга Леонтьева: «Күргәзмә ул чор кешеләренең тормышының төрле якларын аның төрле чагылышларында чагылдыра. Игътибар үзәгендә – Париж, ул вакыттагы дөнья башкаласы, «гүзәл чор»ның төп шәһәре. Париж төрлечә күрсәтелгән. Бу импрессионистлар Парижы гына түгел, бу шәһәрнең традицион әйберләрдә, академик картиналарда чагылышы. Төрле темаларда һәм аспектларда без төрле рәссамнар яшәгән һәм эшләгән бик кызыклы һәм бай вакытны күрсәтәбез», – дип өстәде.

«Казан Кремле» музей-тыюлыгы директоры Илнур Рәхимов Дәүләт Эрмитажына ышанычлары һәм республика җитәкчелегенә ярдәмнәре өчен рәхмәт белдерде. Шулай ук ул проект рәссамнары Илья Артамонов һәм Александр Леухинның эшен билгеләп үтте, алар ярдәмендә һәр күргәзмә уникаль була, күпсанлы кунакларны җәлеп итеп кенә калмый, Казан Кремле кунакларына уңай һәм яхшы кәеф бүләк итә.

Күргәзмәдә матур әсәрләр генә түгел, рәсемнәр, гравюралар һәм декоратив-гамәли сәнгать әйберләре дә бар. Экспозиция белән танышу берничә тематик бүлек буенча бара, алар арасында «Пейзаж», «Саф һавада ял», «Күңел ачулар», «Гүзәлләр» һәм башкалар.

Күргәзмә проекты интерактив элементлар, тактиль һәм хуш исле станцияләр белән тулыландырылган. Залларның берсендә ясалма интеллект хәтта сезнең портретны рәссам-импрессионистлар стилендә ясаячак.

«Гүзәл чор. XIX-XX гасырлар чигендәге Европа сәнгате» күргәзмәсен 2025 елның 14 сентябренә кадәр карарга мөмкин. Проект кураторлары уйлавынча, һәр өч ай саен графика алышыначак.

Эш режимы: дүшәмбе – ял көне, сишәмбе-пәнҗешәмбе – 10:00-18:00, җомга – 11:00-20:00, шимбә – якшәмбе-10:00-18: 00

Элемтә ысуллары: +7 (843) 567-80-32, +7 (843) 567-80-34, hermitage@kazan-kremlin.ru