Казан Кремлендә «Мирас һәм традицияләр» декоратив-гамәли сәнгать күргәзмәсе ачылды

2023 елның 17 июлендә Гавами урыннары күргәзмә залларында «Мирас һәм традицияләр» күргәзмәсе тантаналы рәвештә ачылды. Биредә декоратив-кулланма сәнгатьнең төрле юнәлешләре буенча 400дән артык эш тәкъдим ителгән: лак миниатюрасы, керамика һәм фарфор, таш кисү сәнгате, эмальер сәнгате, металлны сәнгатьле эшкәртү, автор курчаклары, сөяк һәм агачтан сәнгатьле уеп ясау, корал сәнгате, тире эшкәртү, пыяла эшкәртү, зәркән сәнгать, этник бизәнү әйберләре сәнгате, цифрлы графика.

Күргәзмәдә Татарстан, Башкортстан, Дагстан һәм Алтай Республикаларыннан; Мәскәү һәм Санкт-Петербургтан; Мәскәү, Свердловск, Түбән Новгород өлкәләреннән; Ненец автономияле округыннан, Ставрополь краеннан, Луганск Халык Республикасыннан талантлы осталарның эшләре тәкъдим ителде.

Ачылышта Татарстан Республикасы Мәдәният министрының беренче урынбасары Юлия Адгамова катнашты, ул: «Бүген, Россия Федерациясе Президенты Указы белән ике ел элек билгеләнгән Россия фольклор көнендә, күргәзмәне ачуыбыз бик символик мәгънәгә ия. Ләкин монда иң мөһиме – яшь буынга тупланган тәҗрибәне һәм белемнәрне саклаучы, тапшыручы һәм җиткерүче кешеләр, аларсыз бу проект та, башкалар да мөмкин булмас иде. Бу күргәзмә кеше куллары белән барлыкка китерелгән халык иҗатына кагылырга, башка халыкларның мәдәнияте һәм сәнгате белән танышырга мөмкинлек бирә».

«Кулланма сәнгать рәссамнарының иҗади берлеге» төбәкара иҗтимагый оешмасы директоры Сергей Коломийцев: «Без Казан шәһәренә, Татарстан Республикасы Мәдәният министрлыгына шундый җылы кабул итүләре, Казан Кремлендә иң яхшы мәйданчык биргәннәре, Россия, Татарстан мәдәниятен үстерергә бәяләп бетергесез өлеш керткәннәре, безгә иң яхшы рәссамнарны алып килергә мөмкинлек биргәннәре өчен бик рәхмәтле», – дип ассызыклады.

Иҗтимагый палата рәисе Зилә Вәлиева: «Бүген халык сәнгатенә, халык осталары иҗатына зур игътибар бирелә – болар барысы да яңа дәрәҗәгә күтәрелә», – диде.

«Татнефть-Наследие» тарихи һәм мәдәни мирасны саклауга ярдәм итү үзәге» автоном коммерцияле булмаган оешма директоры Аделина Павлова болай дип аңлатты: «Безнең «Таткультресурсүзәк» белән берлектә эшләвебез көчәя генә бара, һәм мин нәкъ менә халык һөнәрләренә зур игътибар бирелүенә бик шатмын, чөнки безнең юнәлешләрнең берсе – тарихи-мәдәни мирас».

Казан дәүләт мәдәният институтының укыту-тәрбия эше буенча проректоры Татьяна Леонтьева чыгышларны йомгаклап: «Бүген бу күргәзмә белән танышу миндә бик сөенечле тәэсирләр калдырды. Декоратив-кулланма сәнгатьнең ничек бирелүе, аның заманча һәм актуаль булуын күрү аеруча рәхәт. Бу инде мирас кына түгел, ә аның никадәр заманча һәм әһәмиятле булуын күрсәтүдә алга таба бер адым да», – дип белдерде.

«Мирас һәм традицияләр» күргәзмәсе дәвамында кунаклар танылган рәссамнар һәм осталар белән аралаша ала. Чара видеофильмнар күрсәтү белән озата барылачак. Күргәзмә 23 июльгә кадәр дәвам итә. Шулай ук күргәзмә кысаларында лекцияләр һәм мастер-класслар каралган.

Күргәзмә Казан Кремле Гавами урыннары бинасының 1 подъездында урнашкан. Эш режимы: дүшәмбе-пәнҗешәмбе 10:00-18: 00, җомга:11:00-20:00, шимбә-якшәмбе 10:00-18:00. Керү ирекле.