«Манеж»да «Казан Кремле» музей-тыюлыгының 30-еллыгына багышланган почта открыткаларына мөһер сугу тантанасы узды

2024 елның 7 февралендә «Казан Кремле» музей-тыюлыгының 30 еллыгын бәйрәм итү хөрмәтенә чыгарылган маркировкалы открыткаларга мөһер сугу тантанасы узды. Тантаналы чара «Манеж» күргәзмә залында «Марка сәнгате» рәсем һәм почта миниатюрасы күргәзмәсендә узды.

Истәлекле открыткаларда «Казан Кремле» музей-тыюлыгы фондларыннан картиналар сурәтләнгән. Бу атаклы рәссам Азат Галимовның рәсем эшләре: «Сөембикә манарасы» һәм «Кремль метро тукталыш янында». Шулай ук Казан Кремле күренеше сурәтләнгән фото. Бу чара өчен махсус сувенир штемпель ясала, анда «Казан Кремле» музей-тыюлыгына нигез салу датасы 1994 елның 22 гыйнвары күрсәтелгән.

Тантанада Татарстан Республикасы мәдәният министры урынбасары Дамир Натфуллин, Татарстан Республикасы дәүләт идарәсен цифрлы нигездә үстерү, мәгълүмат технологияләре һәм элемтә министры урынбасары Альберт Яковлев, «Марка» АҖ генераль директоры Артем Әдибеков, «Казан Кремле» музей-тыюлыгы директоры Илнур Рәхимов катнашты.

Дамир Натфуллин тантанага килгән кунакларын сәламләп: «Быел үзенең 30 еллыгын бәйрәм итә торган республикабызның визит карточкасы булган «Казан Кремле» музей-тыюлыгында өстендә зур халыкара чаралар алдыннан зур җаваплылык ята. Бүген тантаналы рәвештә – мөһер сугылды. Бу музей-тыюлык тарихында һәм Татарстан Республикасы тарихында калачак. Әлеге чара ярдәмендә башкала кунаклары Татарстанның визит карточкасының бер өлешен үзләренә истәлеккә ала алачак».

Артем Әдибеков марка сәнгатенә багышланган күргәзмә оештыру мөмкинлеге өчен рәхмәт белдерде. «Музей-тыюлыкның 30-еллыгына багышланган күргәзмә һәм чара кунакларда җылы һәм якты тәэсирләр уятыр, дип өметләнәм һәм алга таба хезмәттәшлеккә ышанам», – диде ул.

Альберт Яковлев фикеренчә: «Татарстанның тематик нәфис маркалар буенча тәкъдимнәре һәм инициативалары күп булды, аларны «Марка» АҖ хуплады. Маркалар – Россия һәм бөтен дөнья халкына республиканың истәлекле урыннары һәм истәлекле вакыйгалары турында җиткерү өчен ачык корал».

Илнур Рәхимов ассызыклаганча: «Бүгенге чара безнең өчен аеруча мөһим һәм хөрмәтле. Без «Марка» АҖ хезмәттәшләре белән Казан һәм Татарстан Республикасы белән бәйле төрле истәлекле даталарга бәйле маркаларны гамәлгә чыгару һәм мөһер сугу традициясен дәвам итәбез».

Юбилей почта карточкаларында В хәрефе белән марка бар, шуңа күрә аларны илебезнең теләсә кайсы ноктасына җибәрергә мөмкин. Открыткаларны Казан Кремле җирлегендәге сувенир нокталарыннан сатып алырга мөмкин булачак. Барлыгы 2 000 данә открытка бастырылган.

Исегезгә төшерәбез, 2024 елда «Казан Кремле» музей-тыюлыгы үзенең 30 еллыгын билгеләп үтә. Ул 1994 елның 22 гыйнварында Татарстан Республикасының Беренче Президенты М.Ш. Шәймиев Указы нигезендә расланды. Бу датага махсус рәвештә 3 сюжетлы 3,5 мең данә тираж белән уникаль маркировкалы карточкалар чыгарылган.